इन्डोनेसियाको जाभा प्रान्तमा गएको भूकम्पमा परी मृत्यु हुनेको संख्या १६२ पुगेको छ। सयौँ घाइतेको अस्पतालमा उपचार भइरहेको छ। मृतकमध्ये अधिकांश सामुदायिक विद्यालयका विद्यार्थी रहेको पश्चिम जाभाका गभर्नर रिदवान कमिलले बताए। ती विद्यार्थीले विद्यालयको पढाइ सकेर इस्लामिक धार्मिक कक्षामा सहभागी भएका बेला भवन भत्किएको थियो।

भूकम्पमा परी ३०० जना गम्भीर घाइते भएका छन्। ६०० जना सामान्य घाइते भएको स्थानीय अधिकारीहरूले जनाएका छन्।

पश्चिमी जाभाको सियानजुर शहरलाई केन्द्रबिन्दु बनाएर सोमबार ५.६ म्याग्निच्युडको भूकम्प गएको थियो। राजधानी जकार्ताको दक्षिण क्षेत्रमा पर्ने सियानजुर शहर जाभाको सबैभन्दा बढी जनसंख्या भएको शहर हो। त्यहाँ १ लाख ७५ हजार मानिसको बसोबास छ।

भूकम्पका कारण घर, व्यापारिक संरचना र सडकमा क्षति पुगेको छ। भत्किएका संरचनामा पुरिएका मानिसको खोजी कार्य जारी छ। भग्नावशेषमा थुप्रैको शव भेटिएको अन्तर्राष्ट्रिय समाचार संस्था एपीले जनाएको छ। १३ हजार घर पूर्णरूपमा क्षतिग्रस्त छन्।

भूकम्पपछि सियानजुरको उत्तरपश्चिमी सिजेदिल गाउँमा पहिरो खसेको छ। यहाँका थुप्रै घरमा क्षति पुगेको छ। त्यस क्षेत्रमा अझै २५ जना मानिस पुरिएको आशंका गरिएको छ। खोजी कार्य जारी रहेको राष्ट्रिय अनुसन्धान तथा उद्धार विभागका प्रमुख हेन्री अलफियान्दिले बताए।

उनले भने, “थप मानिस पुरिएको आशंकामा हामीले उद्धार कार्यलाई बिस्तार गरेका छौँ। साथै हाम्रो टोली अन्य ग्रामीण क्षेत्रमा पुग्ने प्रयाससमेत गरिरहेको छ। हामीले ती क्षेत्रमा पुरिएका मानिसहरूलाई जीवितै उद्धार गर्ने र आवश्यक स्वास्थ्य सहयोग गर्ने प्रयास गरिरहेका छौँ।”

भूकम्पका कारण सडक तथा पुलहरू भत्किएको र विद्युत् आपूर्तिमा समेत समस्या आएका कारण उद्धारमा कठिनाइ भएको थियो। मंगलबारदेखि विद्युत् आपूर्ति र मोबाइल फोनहरू सञ्चालनमा आएपछि भने उद्धारमा सहज भएको छ। 

विशेष गरी सियानजुरमा अधिकांश मानिसहरू भत्किएका संरचनाहरूमा पुरिएको र उद्धारको पर्खाइमा रहेको स्थानीय अधिकारीको भनाइ छ। त्यस क्षेत्रमा ७ वटा डोजर र १० वटा ठूला ट्रक खटाइएको र सडकका अवरोध हटाउने कामसमेत भइरहेको बताइएको छ।

भूकम्प प्रभावितलाई मानवीय तथा खाद्यान्न सहयोग पठाउने क्रम जारी छ। मंगलबार मात्रै खाद्यान्न, टेन्ट, ब्लान्केट्स र अन्य आवश्यक सामग्री बोकेका कार्गो ट्रकहरू जकार्ताबाट घटनास्थलमा पुर्‍याइएको थियो। भूकम्पपछि परकम्प गइरहेका कारण हजारौँ मानिसहरू अझै पनि घरबाहिर नै अस्थायी टहरा बनाएर बसिरहेका छन्।