अमेरिकी राष्ट्रपति डोनाल्ड ट्रम्पले स्टिल र एलुमिनियम आयातमा २५ प्रतिशत शुल्क लगाउने कार्यकारी आदेशमा हस्ताक्षर गरेका छन्। युरोप र चीनको चेतावनीका बाबजुदबीच उनले मार्च १२ देखि लागू हुने गरी उक्त कार्यकारी आदेशमा हस्ताक्षर गरेका हुन्।
“आज म स्टिल र एलुमिनियममा हाम्रो शुल्कलाई सरलीकरण गर्दै छु”, ट्रम्पले सोमबार ओभल अफिसमा भने, “यो कुनै अपवाद वा छुटबिना २५ प्रतिशत हो।”
त्यसपछि जारी गरिएको कार्यकारी आदेशमा उनले, “सन् २०२५ मार्च १२ सम्म अर्जेन्टिना, अस्ट्रेलिया, क्यानाडा, मेक्सिको, युरोपेली संघ (इयू) का देशहरू र बेलायतबाट एलुमिनियम वस्तु र व्युत्पन्न एलुमिनियम वस्तुको सबै आयात अतिरिक्त विज्ञापन मूल्य शुल्कको अधीनमा हुनेछ।”
ट्रम्पले स्टिलका लागि छुट्टै आदेश जारी गरेका छन्। आदेशमा एलुमिनियम शुल्क लागेका सबै देशका साथै ब्राजिल, जापान र दक्षिण कोरियाबाट हुने सबै आयातमा लागू हुने बताइएको छ।
अमेरिकी व्यापार तथ्यांकअनुसार क्यानडा र मेक्सिको अमेरिकाका लागि सबैभन्दा ठूलो स्टिल आयातकर्ता हुन्। ब्राजिल र दक्षिण कोरिया पनि प्रमुख स्टिल आपूर्तिकर्ता हुन्।
ट्रम्पले अटोमोबाइल, फार्मास्युटिकल्स र कम्प्युटर चिप्समा थप कर लगाउने संकेत पनि गरेका छन्।
“राष्ट्रपति ट्रम्पले अमेरिकाको पहिलो स्वर्ण युगको एउटा महत्त्वपूर्ण अंश स्टिल उत्पादन हो भन्ने स्पष्ट पार्नुभएको छ”, राष्ट्रिय आर्थिक परिषद्का निर्देशक केभिन ह्यासेटले सीएनबीसीलाई भने।
ट्रम्पले अमेरिकी उत्पादनमा अन्य सरकारले लगाउने शुल्कसँग मेल खाने गरी व्यापक ‘पारस्परिक शुल्क’ मंगलबार या बुधवार घोषणा गर्ने वाचा पनि गरेका छन्।
आफ्नो सन् २०१७–२०२१ को राष्ट्रपति कार्यकालमा ट्रम्पले एशियाली र युरोपेली देशबाट अमेरिकी उद्योगले अनुचित प्रतिस्पर्धाको सामना गरेको विश्वास गर्दै व्यापक शुल्क लगाएका थिए।