काठमाडौँ– सगरमाथामा असोज महिनामा करिब नौ हजार पर्यटकले भ्रमण गरे। उक्त महिना आठ हजार ९०२ जना पर्यटक खुम्बु क्षेत्रमा गएको सगरमाथा राष्ट्रिय निकुञ्जले जनाएको छ। खुम्बु क्षेत्रमा भित्रिएका पर्यटकबाट दुई करोड ३ लाख ४८ हजार ५५३ राजश्व संकलन भएको छ। लुक्लादेखि सगरमाथाको आधार शिविरसम्म पर्यटकीय चहलपहल बढ्दो छ।

म्याग्दीको अन्नपूर्ण गाउँपालिकामा अवस्थित अन्नपूर्ण प्रथम हिमालको आधार शिविरमा अहिलेसम्मकै धेरै पर्यटक भित्रिएको तथ्यांक छ। हाल आन्तरिक र विदेशी पर्यटकले अन्नपूर्ण आधार शिविर भरिभराउ छ। त्यहाँ पुग्ने पदमार्गको पहिचान भएको १३ वर्षको अवधिमा यसपटक धेरै पर्यटक आएको पदमार्गका अभियन्ता तेज गुरुङले बताए। उनका अनुसार दशैँपछि मात्रै करिब तीन हजार पर्यटकले आधार शिविरको भ्रमण गरेका छन्।

अहिले मुख्य पर्यटकीय याम चलिरहेकाले पनि देशभरका गन्तव्यमा पर्यटकीय चहलपहल बाक्लिएको हो। पदयात्रा र पर्वतारोहणका लागि शरद ऋतु उपयुक्त मानिन्छ। वसन्त ऋतुमा सगरमाथासहितका हिमाल आरोहण र पदयात्रामा सबैभन्दा धेरै विदेशी पर्यटक आउने गरेका छन्। साहसिक पर्यटनका लागि अति उपयुक्त मानिने यस याममा हिमाल र पहाडी डाँडापाखाको दृश्यावलोकनको मज्जा लिन पदयात्री औधी रुचाउँछन्।

मुख्य पर्यटकीय सिजन तथा दशैँ र तिहारको बिदाको समयलाई सदुपयोग गर्दै आन्तरिक पर्यटक उल्लेख्य रूपमा गन्तव्य पुग्ने गरेका छन्। पदयात्रा र पर्वतारोहणका लागि विदेशी पर्यटक  विश्वप्रसिद्ध अन्नपूर्ण क्षेत्र, खुम्बु, मनास्लु, लाङ्टाङलगायत गन्तव्यमा पुगेका छन्। अन्य पर्यटकीय गन्तव्यमा पाहुनाको घुइँचो छ।

नेपाली पर्यटनको महत्त्वपूर्ण हिस्सा ओगट्ने संसारकै आकर्षण पर्वतारोहणका लागि पनि यो याम उपयुक्त मानिन्छ। यतिखेर धेरै आरोही पर्वतारोहणका लागि नेपाल आएका छन्। मनास्लु, अमादब्लम, अन्नपूर्णलगायतका उच्च हिमशृंखला आरोहण उनीहरूको रोजाइमा पर्छ। अनुपम प्राकृतिक विविधताले भरिपूर्ण नेपालको सौन्दर्यता अवलोकनका लागि विश्वभरका पर्यटक यतिखेर नेपालका विभिन्न पर्यटकीय गन्तव्यको मज्जा लिइरहेका छन्। भू–धरातलीय स्वरूप, हरिया डाँडाकाँडा, मनमोहक झरना तथा उत्तरतर्फ चाँदीका घेरा झैँ टल्किएका हिमालले पदयात्री पर्यटकको आकर्षण बढाएको छ। विदेशी पर्यटकको उत्साहवर्द्धक आगमनले व्यवसायी पनि उत्साहित भएका छन्।

होटल संघ नेपालका महासचिव साजन शाक्यका अनुसार अहिले ७० देखि ८० प्रतिशत होटलको ‘अकुपेन्सी’ रहेको छ। “होटेल क्षेत्रमा बुकिङ राम्रो छ। अक्टोबर र नोभेम्बर अन्तिमसम्म राम्रो छ। धेरै पदयात्री र पर्वतारोही आएका छन्। ठमेललगायत मुख्य गन्तव्यमा ८० प्रतिशत अकुपेन्सी छ। देशभरका होटलमा ७० प्रतिशतसम्म अकुपेन्सी रहेको जानकारी प्राप्त भएको छ,” उनले भने। 

उनका अनुसार खुम्बु, अन्नपूर्णलगायत गन्तव्यका होटलमा पर्यटक खचाखच छन्। पोखरा, चितवन, लुम्बिनीमा पर्यटकको चहलपहल बढेको छ। काठमाडौँ उपत्यका आसपासका नगरकोट, धुलिखेललगायत गन्तव्यका होटल भरिभराउ छन्।

नेपाल पर्यटन बोर्डको तथ्यांकअनुसार सन् २०२४ को नौ महिनामा अर्थात्  वर्षको जनवरीदेखि सेप्टेम्बरसम्म आठ लाख १६ हजार ३३९ पर्यटकले नेपाल भ्रमण गरेका छन्। समग्रमा अघिल्लो वर्ष सन् २०२३ को तुलनामा ६ प्रतिशत र सन् २०१९ भन्दा चार प्रतिशतले पर्यटक आगमन बढेको छ।

नेपाल एसोसिएसन अफ टुर्स एन्ड ट्राभल्स एजेन्ट्स (नाट्टा) अध्यक्ष कुमारमणि थपलियाले पर्यटन क्षेत्र चलायमान बनिरहेको बताए। उनले त्रिभुवन अन्तर्राष्ट्रिय विमानस्थलको क्षमता विस्तार तथा मर्मतको कामले उडान कटौती हुने हुँदा पर्यटन क्षेत्रलाई असर पर्नसक्ने सम्भावना औँल्याए। “पर्यटकीय याम चलिरहेको समयमा विमानस्थलको मर्मतको कामले हवाई उडान  खुम्चिन्छ र ट्राभल कम्पनीहरूको अकुपेन्सी घट्न जान्छ। त्यसैले हामीले विमानस्थल मर्मतको काम केही पर सार्न वा उडान अवधि बढाउन सम्बन्धित निकायमा पहल गरिरहेका छौँ,” अध्यक्ष थपलियाले भने।

नेपाल नागरिक उड्डयन प्राधिकरणले कात्तिक २३ गतेदेखि काठमाडौँ विमानस्थल मर्मत गर्दै छ। करिब ६ महिना विमानस्थलको उडान १० घण्टा बन्द हुनेछ। यसले अन्तर्राष्ट्रिय एयरलाइन्सको उडानमा भारी कटौती हुनेछ। नेपाल पर्यटन बोर्डका निर्देशक मणिराज लामिछानेले पर्यटकीय सिजनमा देशका अधिकांश गन्तव्य पर्यटकले भरिभराउ भएको बताए। 

“गन्तव्यहरूमा विदेशी तथा स्वदेशी पर्यटकको घुइँचो लागेको छ। होटल तथा रिसोर्टमा अकुपेन्सी एकदमै राम्रो रहेको पाइएको छ,” उनले भने, “अक्टोबरको सुरुआतमा वर्षाले एकसाता समस्या गरे पनि हाल सबै चिज सामान्य भएर पर्यटन पुरानै लयमा फर्किएको छ।”