बैतडी– मौसममा आएको परिवर्तनसँगै बैतडीका गाउँ–गाउँमा भाइरल ज्वरोका बिरामी बढ्न थालेका छन्। यहाँका अस्पताल, प्राथमिक स्वास्थ्य केन्द्र, स्वास्थ्यचौकी, निजी क्लिनिकमा भाइरल ज्वरोका बिरामी बढ्न थालेका स्वास्थ्यकर्मीले बताएका हुन्।
पछिल्लो केही सातायता जिल्लाभरिका स्वास्थ्य संस्थामा भाइरल ज्वरोका बिरामीको चाप बढेको स्वास्थ्य कार्यालय बैतडीका सूचना अधिकारी विपिन लेखकले जानकारी दिए।
“मौसममा आएको परिवर्तनसँगै जिल्लाका गाउँ–गाउँमा भाइरल ज्वरोको संख्या बिरामी बढेको छ। जिल्ला अस्पतालमा उपचारका लागि आउने बिरामीमध्ये सबैभन्दा बढी भाइरल ज्वरोका बिरामी हुने गरेका छन्,” उनले भने।
अस्पतालका सूचना अधिकारी चन्द्र डोबालका अनुसार पहिलेको तुलनामा हाल भाइरल ज्वरोका बिरामी बढेका छन्। उपचारका लागि आउने बिरामीमध्ये ६० प्रतिशतभन्दा बढीमा भाइरल ज्वरो देखिएको उनले जानकारी दिए।
उपचारका लागि आउने बिरामीमध्ये सबैभन्दा बढी भाइरल ज्वरोका रहेका भन्दै टाइफाइड, श्वासप्रश्वास, डेंगी, स्क्रब टाइफसलगायत समस्या भएका बिरामी पनि आउने गरेका सूचना अधिकारी डोबालले बताए।
प्राथमिक स्वास्थ्य केन्द्र पाटनमा आउने बिरामीमध्ये ५० प्रतिशत भाइरल ज्वरोका बिरामी रहेका केन्द्रका जनस्वास्थ्य निरीक्षक प्रेमसागर भट्टले जानकारी दिए। “दैनिक ८० जनाभन्दा बढी बिरामी उपचारका लागि आउने गरेकामा करिब ५० प्रतिशत भाइरल ज्वरोका छन्,” उनले भने।
मेलौलीस्थित केशरपुर प्राथमिक स्वास्थ्य केन्द्रमा दैनिक १०० जना उपचारका लागि आउने गरेकामा ८० जनाको हाराहारीमा भाइरल ज्वरोका बिरामी पुग्ने गरेका जनस्वास्थ्य निरीक्षक मुकेशकान्त दयालले जानकारी दिए।
पुर्चौंडी क्षेत्रमा पनि अन्यको तुलनामा भाइरल ज्वरोको बिरामीको संख्या बढेको छ। स्वास्थ्य संस्थामा उपचार गर्न पुग्नेमध्ये अधिकांश भाइरल ज्वरोका बिरामी रहेका पुर्चौंडी नगरपालिकाका स्वास्थ्य शाखा प्रमुख सुरेन्द्रप्रसाद अवस्थीले बताए।
मौसम परिवर्तनका साथै अस्वस्थकर खानपिनले पनि भाइरल ज्वरोको संक्रमण बढेको श्रीकोट स्वास्थ्य चौकीका इन्चार्ज वीरसिंह भाटले बताए।
“स्वास्थ्य चौकीमा उपचार गर्न आउने बिरामीमा भाइरल संक्रमण देखिने गरेको छ। ज्वरोका बिरामीमा अन्य संक्रमण पनि हुनसक्ने भएकाले परीक्षण गरेर मात्रै औषधि दिने गरेका छौँ,” उनले भने।
पछिल्लो समय जिल्लामा भाइरल ज्वरोका साथै टाइफाइड, स्क्रब टाइफस, डेंगीलगायत बिरामी फेला परिरहेका जिल्लास्थित स्वास्थ्य कार्यालयका प्रमुख तीर्थराज भट्टले बताए। ज्वरोका बिरामीलाई स्वास्थ्य संस्थामा जाँच गराएर मात्रै औषधि सेवन गर्न उनले आग्रह गरे।
प्रमुख भट्टले ज्वरोका बिरामीले मेडिकलबाट आफूखुशी औषधि किनेर प्रयोग गर्ने भएकाले यसले थप समस्या हुन सक्ने भएकाले चिकित्सकको सल्लाहअनुसार मात्र औषधि सेवन गर्नुपर्नेमा जोड दिए।