काठमाडाैँ– इंग्लिस प्रिमियर लिग (ईपीएल)मा आर्सनलले टोटनह्याममाथि जित निकाल्दै शीर्ष स्थानको म्यानचेस्टर सिटीसँगको अंक दुरी छोट्याएको छ।
चौथो खेलमा तेस्रो जित निकाल्ने क्रममा आर्सनलले टोटनह्यामलाई १-० ले पराजित गरेको हो। आइतबार राति टोटनह्यामको घरेलु मैदानमा भएको खेलमा आर्सनललाई जित दिलाउन गेब्रियल मगाल्हेसले गोल गरे।
खेलको ६४औँ मिनेटमा मगाल्हेसले गरेको गोल नै निर्णायक बन्यो। यस जितसँगै दोस्रो स्थानमा रहेको आर्सनलले ४ खेलबाट १० अंक प्राप्त गरेको छ, जुन म्यानचेस्टर सिटीको भन्दा दुई अंकले कम हो। समान खेलबाट टोटनह्याम भने ४ अंकसहित १३औँ स्थानमा छ।
यस्तै, आइतबार राति नै भएको अर्को खेलमा न्युकास्टलले वुल्भ्सलाई २-१ ले पराजित गरेको छ। खेलको ३६औँ मिनेटमा मेरियो लेमिनाले गोल गर्दै वुल्भ्सलाई शुरूआती अग्रता दिलाए पनि दोस्रो हाफमा न्युकास्टलले दुई गोल गर्न सफल भयो। खेलको ७५ र ८०औँ मनेटमा क्रमश: फेबियन र हार्भी बर्नेसले गोल गरे।
न्युकास्टल ४ खेलमा १० अंकसहित तेस्रो स्थानमा रहेको छ भने समान खेलमा १ अंकसहित वुल्भ्स १८ औँ स्थानमा छ।