जनकपुरधाम– ऊर्जा, जलस्रोत तथा सिँचाइ मन्त्रालयअन्तर्गत बागमती मनुस्मारा झाँझ सिँचाइ व्यवस्थापन कार्यालय कर्मेया, सर्लाहीको स्वामित्वमा रहेको सात कट्ठा सरकारी जमिन अतिक्रमणको चपेटामा परेको छ। स्थानीय हरिनारायण झाका छोराहरूले उक्त जग्गा आफ्नो रहेको दाबी गरेपछि सो कार्यालयले जमिनको सुरक्षाको माग गरेको हो।

सर्लाहीको साबिक गाविस सुन्दरपुर चौहडवा–८ हाल बरहथवा नगरपालिका–१३ स्थित कित्ता नं १८५ र १८८ को सात कट्ठा जमिनमा स्व झाका छोरा गंगाधर झा, प्रमोद झा, चन्द्रमोहन झा, चन्द्रवंशी झा र राजवंशी झाले आफ्नो भनी दाबी गरिरहेकोले विवाद उत्पन्न भएको कार्यालय प्रमुख रामदुलारी शरण भगतले जानकारी दिए। उनीहरूले उक्त जमिनमा दाबी गरेपछि अख्तियार दुरुपयोग आयोगको कार्यालय बर्दिबास तथा जिल्ला प्रशासन कार्यालय सर्लाही मलगङ्वामा सिँचाइ व्यवस्थापन कार्यालयले आफ्नो प्रमाण तथा दाबीसहित सुरक्षाका लागि लिखित निवेदन पेश गरेको उनले उल्लेख गरे। 

तीन करोड रुपैयाँ मूल्य बराबरको सो जमिन विसं २०४० मा मन्त्रालयले सिँचाइ कार्यका लागि मुआब्जा वितरण गरेर अधिग्रहण गरेको थियो। जमिनको मूल्य बढेपछि ४० वर्षपछि उक्त जमिनमा विवाद शुरू भएको स्थानीय बताउँछन्। 

विसं २०४० अगाडि स्थानीय जमिनका धनीहरूलाई मुआब्जा दिएर जग्गा अधिग्रहण गरिएको थियो। त्यसमा स्थानीय धेरैले आ–आफ्नो जमिन सिँचाइ कार्यालयको पूर्वाधार निर्माणका लागि हस्तान्त्ररण गरेर मुआब्जा लिएका थिए। 

सोही क्रममा स्व. हरिनारायण झाले पनि बिक्री गरेका कार्यालय प्रमुख भगतले बताउँदै विसं २०५० मा बागमती नदीमा आएको बाढीले सो कार्यालयका सम्पूर्ण कागजात नष्ट भएको जानकारी दिए। 

मालपोत कार्यालय बरहथवामा उक्त कित्ता नम्बरको जमिनको स्रेस्ता पाना च्यातिएकाले स्व. झाका छोराहरूले सो जमिन आफ्नो भनी दाबी गरेका कार्यालयका कर्मचारीहरू बताउँछन्। 

विवाद समाधानका लागि नापी कार्यालय बरहथवाको नापी टोली, सशस्त्र प्रहरी र नेपाल प्रहरीका साथै स्थानीय जनताको भेलाले सो जमिनका सम्बन्धमा मुचुल्का तयार गरिएको छ। सो क्रममा १०० बढी स्थानीय, जल उपभोक्ता र सिँचाइका पुराना कर्मचारीको उपस्थिति थियो।

मुचुल्का तयार गर्ने क्रममा उपस्थितले उक्त जमिन सिँचाइ कार्यालयको रहेको लिखित पत्रमा हस्ताक्षर गरेका प्राप्त विवरण निवेदनमा जनाइएको प्रमुख भगतले जानकारी दिए।

अधिग्रहण भएको जमिनमा निर्मित जस्तापाताको छानाले छाएको दुईतले इँटा लगाएको जीर्ण पक्की घर र गार्डकोठा प्रमाणका रूपमा रहेका जनाइएको छ। स्व. झाका छोराहरूले उच्च अदालत जनकपुरमा आफ्नो जमिन भएको दाबी गर्दै मुद्दा दायर गरेका छन्। साथै मालपोत कार्यालय बरहथवामा पनि आफ्नो हो भनी निवेदन दिएको मालपोत कार्यालयले जनाएको छ।

सिँचाइ आयोजनाको निर्माण २०३९/४० देखि शुरू भई २०४४/४५ मा कार्यान्वयनमा आएको थियो। कार्यालयअन्तर्गत हीरापुर ब्यारेज मनुस्मारा सिँचाइ प्रणाली प्रथमबाट दुई हजार आठ सय हेक्टर तथा मानपुर ब्यारेज मनुस्मारा सिँचाइ प्रणाली दोस्रोबाट तीन हजार दुई सय हेक्टर जमिनमा सिँचाइ सुविधा पुर्‍याइँदै आइएको कार्यालय प्रमुख भगतले जानकारी दिए।

उनका अनुसार उक्त सिँचाइ आयोजनाबाट ६ हजार ७०० परिवारका ५० हजार जनता लाभान्वित भएका छन्। आयोजनाको निर्माणले हाल ४० हजार २४४ मेट्रिकटन खाद्यान्न उत्पादन शुरू भएको भगतले जानकारी दिए।