Saturday, July 13, 2024

-->

किसानलाई प्रोत्साहन गर्न ‘ब्रान्डिङ’ गरिँदै लहानको आँप

स्थानीय उत्पादनलाई प्रवर्द्धन र किसानलाई प्रोत्साहन गर्ने उद्देश्यले लहानमा उत्पादित आँपको ‘ब्रान्डिङ’ गर्न थालिएको छ।

किसानलाई प्रोत्साहन गर्न ‘ब्रान्डिङ’ गरिँदै लहानको आँप
सिरहाको लहान नगरपालिका–१ स्थित स्थानीय किसानले बिक्रीका लागि राखेका आँप। तस्वीर : सुदिप राउत/रासस

सिरहा– स्थानीय उत्पादनलाई प्रवर्द्धन र किसानलाई प्रोत्साहन गर्ने उद्देश्यले लहानमा उत्पादित आँपको ‘ब्रान्डिङ’ गर्न थालिएको छ। आँपको राजधानी मानिएको लहानबाट शनिबारदेखि औपचारिक रूपमा आँपको संकलन, ‘ग्रेडिङ’, ‘प्याकेजिङ’, ‘ब्रान्डिङ’ तथा बजारीकरण कार्यक्रम शुरू भएको हो।

गत वर्ष ३० मेट्रिक टन आँप ब्रान्डिङ गरी काठमाडौँलगायत देशका विभिन्न शहरमा बिक्री वितरण गरेको लहान नगरपालिकाले यस वर्ष ५० मेट्रिक टन बिक्री गर्ने लक्ष्यसहित लहानको आँप ‘ब्रान्डिङ’ कार्यलाई निरन्तरता दिएको नगरपालिकाका कृषि शाखाका संयोजक एवं वडा नं १२ का वडाध्यक्ष बद्रीनारायण चौधरीले बताए। 

यहाँको आँपलाई नेपाली बजारमा पहिचान दिलाउने र उपभोक्ताले विषादीरहित शुद्ध आँप उपभोग गर्न पाउन् भनी नगरले निजी क्षेत्रसँग समन्वय गरी आँपको ब्रान्डिङ थालेको उनले जानकारी दिए। 

“गत वर्षभन्दा यस वर्ष व्यवस्थित रूपमा यहाँको उत्पादित आँपको ब्रान्डिङ गरी बजारीकरण गर्ने योजनाअनुसार आजदेखि काम शुरू गरेका छौँ। यहाँको सरस्वती कृषि फार्मसँग सम्झौता गरी आँपमा लोगो लगाएर काठमाडौँ पठाउने तयारी गरिएको छ,” संयोजक चौधरीले भने, “किसानले असार शुरू भएसँगै मालदह आँप बजारमा ल्याउन थाल्ने भएकाले संकलन गरी पठाउन सम्पूर्ण तयारी गरिएको छ।”

नगरपालिकाले आँपको जातीय शुद्धता र गुणस्तरीयतासहित काठमाडौँको शान्तिनगरमा ‘लहानको आँप’ बिक्री कक्ष सञ्चालन गर्ने भएको छ। राष्ट्रव्यापी अनलाइन माग तथा ‘होम डेलिभरी’का लागि ओयो पसललाई आधिकारिक ‘अनलाइन पार्टनर’ नियुक्त गरिएको कृषि शाखा प्रमुख प्रकाश साह हलुवाईले जानकारी दिए। 

उनका अनुसार यहाँ उत्पादित आँपको ब्रान्डिङ, प्याकेजिङ, डेलिभरी, ढुवानी, बिक्रीकक्ष तथा अन्य आवश्यक सामग्रीमा ५० प्रतिशत अनुदान दिई निरन्तर अनुगमन र मूल्यांकनसमेत गरिनेछ।

स्थानीय आँपको ब्रान्डिङसँगै नगरपालिकाले राख्ने दरभाउमा यहाँका किसानले राम्रो मूल्य पाउने भएपछि आँप खरिद बिक्रीमा बिचौलिया वर्गले लाभ उठाउने परिपाटीको अन्त्य गरेको नगरप्रमुख महेशप्रसाद चौधरीले बताए।

“यहाँका किसानलाई उत्साहित बनाउन नगरपालिकाले आँपको ब्रान्डिङ गरेको हो। यसले यहाँ उत्पादित आँपको पहिचान बनाउने छ। योसँगै उपभोक्ताले विषादीरहित नेपाली आँप बजारमा पाउनेछन्,” उनले भने। 

नगरप्रमुख चौधरीले आँपलाई लामो समयसम्म भण्डारण गरिराख्न चिस्यान केन्द्र आवश्यक भएको भन्दै त्यसका लागि प्रदेश तथा संघीय सरकारलाई सहयोगका लागि अनुरोधसमेत गरेका छन्।

लहानलाई आँपको पकेट क्षेत्रका रूपमा चिनिन्छ। मुख्य गरी यहाँको वडा नं १२, १३, १४, १५, २३, १५, १८, १९ र २४ मा किसानले बीघौबीघा आँपखेती गर्ने गरेका छन्।


सम्बन्धित सामग्री