Monday, June 17, 2024

-->

इरानका राष्ट्रपति चढेको हेलिकप्टरको ‘हार्ड ल्यान्डिङ’

इरानका राष्ट्रपति इब्राहिम रायसी सवार हेलिकप्टरको आइतबार दिउँसो ‘हार्ड ल्यान्डिङ’ भएको इरानी सञ्चारमाध्यमले जनाएका छन्।

इरानका राष्ट्रपति चढेको हेलिकप्टरको ‘हार्ड ल्यान्डिङ’
इरानका राष्ट्रपति इब्राहिम रायसी। तस्वीर : जेसन डेक्रो/एपी

इरानका राष्ट्रपति इब्राहिम रायसी सवार हेलिकप्टरको आइतबार दिउँसो ‘हार्ड ल्यान्डिङ’ भएको इरानी सञ्चारमाध्यमलाई उद्धृत गर्दै जेरुसेलम पोस्टले बताएको छ।

प्रारम्भिक रिपोर्टअनुसार राष्ट्रपतिको हेलिकप्टर हुस्सु लागेका कारण दुर्घटना भएको देखिएको छ। कुनै विमान तथा हेलिकप्टर सामान्य अवतरणको तुलनामा तीव्र गति र बलका साथ जमिनमा ठोक्ने अवस्थालाई ‘हार्ड ल्यान्डिङ’ भनिन्छ।

इरानको तस्निम समाचार एजेन्सीका अनुसार आपत्कालीन सेवाहरूले राष्ट्रपतिको हेलिकप्टरको खोजी गरिरहेका छन्। तर उक्त क्षेत्रमा हुस्सुका कारण खोजी प्रयास जटिल भइरहेको बताइएको छ।

इरानका विदेशमन्त्री होसेन अमिर–अब्दुल्लाहियान र पूर्वी अजरबैजानमा इस्लामिक न्यायिक संरक्षकका प्रतिनिधि मोहम्मद अली आले–हाशेमलगायत हेलिकप्टरमा रहेको जेरुसेलम पोस्टले बताएको छ।

इरानी आधिकारिक सञ्चारमाध्यमका अनुसार राष्ट्रपतिको सवारीमा तीन हेलिकप्टर संलग्न थिए। यसमा दुई वटाले सुरक्षित अवतरण गरेको र एउटा दुर्घटनाग्रस्त भएको छ। उक्त जानकारी पूर्वी अजरबैजानका नागरिक मामिलाका उपसंयोजकले प्रदान गरेका हुन्।

दुर्घटना आइतबार अजरबैजानी–इरानी सीमामा रायसीले अजरबैजानी इल्हम अलियेभसँग भेट गरेको केही घण्टामा भएको हो।


सम्बन्धित सामग्री