Tuesday, May 28, 2024

-->

सीमित खर्चको प्रावधानले सीमा क्षेत्रको पर्यटन प्रभावित

भारतीय पर्यटकले साथमा भारु २५ हजारभन्दा धेरै नगद बोक्न नपाइने नेपाल राष्ट्र बैंकको नियमका कारण पर्यटकले खुलेर खर्च गर्न नपाएको व्यवसायीको गुनासो छ।

सीमित खर्चको प्रावधानले सीमा क्षेत्रको पर्यटन प्रभावित

पर्सा– स्थलमार्ग भई नेपाल भ्रमणमा आउने भारतीय पर्यटकले भारु २५ हजार मात्रै ल्याउन पाउने नियमले सीमावर्ती जिल्लाका पर्यटन क्षेत्र प्रभावित भएको छ।

बारा, पर्सा जिल्लामा भारतीय पर्यटक लक्षित क्यासिनोसहितका साना–ठूला दुई दर्जन होटल सञ्चालनमा छन्। तर भारतीय पर्यटकले साथमा भारु २५ हजारभन्दा धेरै नगद बोक्न नपाइने नेपाल राष्ट्र बैंकको नियम छ। जसका कारण पर्यटकले खुलेर खर्च गर्न नपाएको व्यवसायीको गुनासो छ। 

नेपाल उद्योग वाणिज्य संघ मधेश प्रदेशका अध्यक्ष अशोककुमार टेमानीले सरकारको गलत नीतिले भारतीय पर्यटकले खुलेर खर्च गर्ने वातावरण नबनेको गुनासो गरे।

“हामी नेपालमा पर्यटक भित्र्याउने भनिरहेका छौँ । तर भारतीय पर्यटकलाई भारु २५ हजारभन्दा धेरै रकम बोक्न नपाइने नियमले पर्यटन क्षेत्रको विकासमा अवरोध पुगेको छ,” उनले भने, “सरकारले तत्काल यो नियम पुनः विचार गर्नुपर्छ।” 

वीरगन्ज उद्योग वाणिज्य संघका पूर्वअध्यक्ष सुबोधकुमार गुप्ताले यो प्रावधान खुकुलो बनाउनुपर्ने बताए। “पक्कै भारु २५ हजार मात्रै ल्याउन पाउने नियमले केही जटिलता छ,” उनले भने, “पैसा ल्याउन पाउने सीमा बढाएर अन्तरदेशीय भुक्तानी प्रणालीलाई व्यवस्थित गर्न आवश्यक छ।”

उनले बारा र पर्सामा औद्योगिक, धार्मिक र शैक्षिक पर्यटकलाई आकर्षित गर्नुपर्ने बताए। “बारा/पर्सा जिल्लामा विदेशी उत्पादन कम्पनीका सप्लायर्सको बाक्लो उपस्थिति छ। त्यसलाई हामीले औद्योगिक पर्यटनका रूपमा  विकास गर्नुपर्छ,” उनले भने, “हामीले यहाँ शैक्षिक र धार्मिक पर्यटनको समेत विकास गर्नुपर्छ।”

अध्यागमन विभागका अनुसार सन् २०२३ मा नेपालमा हवाई मार्गबाट १० लाख १४ हजार ८८६ पर्यटक नेपाल आएका थिए। घुम्न आउनेमध्ये सबैभन्दा धेरै भारतीय पर्यटक छन्। भारतबाट तीन लाख १९ हजार ९३६ जना आएका थिए। 

सन् २०२४ को मार्च महिनामा एक लाख २८ हजार १६७ पर्यटक नेपाल भित्रिएका छन्। तीमध्ये भारतीय पर्यटकको संख्या ३० हजार ६९८ रहेको छ। स्थलमार्गबाट आउने भारतीय पर्यटकको संख्या ठूलो भए पनि तथ्यांक राख्ने गरिएको छैन।

उपप्रधानमन्त्री तथा गृहमन्त्री रवि लामिछाने बिहीबार वीरगन्जमा आयोजित एक कार्यक्रममा पर्यटकलाई ठाउँ ठाउँमा चेकिङका नाममा दुर्व्यवहार नगर्न निर्देशन दिए। 

“पर्यटकलाई एक ठाउँमा सुरक्षित ढंगले जाँच गर्नूस्। त्यसपछि पर्यटकलाई निर्वाध रूपमा आफ्नो क्रियाकलाप गर्ने वातावरण सिर्जना गरिदिनूस्,” उनले भने, “पर्यटकलाई गल्ली पिच्छे, मोडपिच्छे र होटलपिच्छे जाँच गरेर दुःख नदिनूस्, त्यसो गर्नु भनेको दुर्व्यवहार गर्नु हो।” 

गृहमन्त्री लामिछानेले भारतीय पर्यटकले भारु २५ हजार ल्याउन पाउने विषयमा सरकारले कूटनीतिक ढंगबाट आवश्यक समन्वय गर्ने बताए।


सम्बन्धित सामग्री