Friday, March 29, 2024

-->

बागमती प्रदेशमा घट्यो सार्वजनिक यातायातको भाडा

काठमाडौँ उपत्यकाभित्र ५.९ प्रतिशत, उपत्यका बाहिर छोटो दूरीका सार्वजनिक सवारीमा ४.१८ प्रतिशत भाडा घटेको छ।

बागमती प्रदेशमा घट्यो सार्वजनिक यातायातको भाडा 
फाइल तस्वीर

काठमाडौँ– बागमती प्रदेशमा चल्ने सार्वजनिक यातायातको भाडा घटेको छ। बागमती प्रदेशको श्रम रोजगार तथा यातायात मन्त्रालयले भाडा घटाएको हो।

नेपाल आयल निगमले डिजेलको भाउ घटाएको नौ दिनपछि बागमती प्रदेशमा छोटो दूरीमा चल्ने गाडीको भाडा घटाइएको हो। काठमाडौँ उपत्यकाभित्र ५.९ प्रतिशत, उपत्यका बाहिर छोटो दूरीका सार्वजनिक सवारीमा ४.१८ प्रतिशत र मालवाहक सवारीसाधनमा ५.६९ प्रतिशतले भाडा घटाएको मन्त्रालयका सचिव अस्मान तामाङले बताए।

“नयाँ भाडादर राजपत्रमा प्रकाशित भइसकेकाले शुक्रबारदेखि नै घटेको भाडादर लागू हुने छ,” उनले भने। यसअघि डिजेलको भाउ बढेका बेला लामो दूरीको गाडी भाडा बढेर छोटो दूरीको नबढेपछि व्यवसायी आफैँले भाडादर तोकेका थिए।

आयल निगमले अघिल्लो हप्ता बुधबारदेखि लागू हुने गरी डिजेलको भाउ घटाएको थियो। लगत्तै सरकारले लामो दूरीको भाडा समायोजना गरेको थियो। लामो दूरी अर्थात् अन्तर प्रदेशको भाडा केन्द्र सरकारबाट र छोटो दूरी अर्थात् अन्तरपालिकाको भाडा प्रदेश सरकारबाट निर्धारण हुने गर्दछ।

गत चैत २० गते डिजेल र मट्टितेलको मूल्यमा प्रतिलिटर १०–१० र पेट्रोलमा ३ रुपैयाँ मूल्य घटाएको निगमले अघिल्लो हप्ता डिजेल र मट्टितेलमा प्रतिलिटर १०–१० रुपैयाँ घटाएको थियो। हाल डिजेलको मूल्य प्रतिलिटर १५५ कायम भएको छ।

अघिल्लो वर्ष प्रदेशभित्र सञ्चालन हुने छोटो दूरीको भाडा बढेको थियो। जसअनुसार यात्रुले काठमाडौँ उपत्यकामा सार्वजनिक गाडीमा न्यूनतम २० तिर्दै आएका छन्।


सम्बन्धित सामग्री