काठमाडौँ– साताको पहिलो कारोबार दिन सेयर बजार परिसूचक नेप्सेमा सामान्य अंकको गिरावट आएको छ।
आइतबार नेप्से परिसूचक ६.९० अंक घटेर १९२६.४० बिन्दुमा झरेको हो। सेन्सेटिभ इन्डेक्स १.५२ अंकले घटेको छ भने फ्लोट इन्डेक्स ०.५८ अंक र सेन्सेटिभ फ्लोट इन्डेक्स ०.६६ अंकले घटेको छ।
कारोबारमा आएका २५९ कम्पनीको ३१ लाख ६३ हजार कित्ता सेयर १ अर्ब ६ करोड ९८ लाख ४ हजार रुपैयाँ बराबरको खरिदबिक्री भएको छ। अघिल्लो कारोबारको तुलनामा आइतबार कारोबार रकममा समेत गिरावट आएको छ। बिहीबार नेप्सेमा १ अर्ब १४ करोडको सेयर खरिदबिक्री भएको थियो।
नेप्सेका १३ उपसमूहमध्ये पाँच उपसमूहको परिसूचक बढेको छ भने आठ उपसमूहको परिसूचक घटेको छ। जसमा होटल तथा पर्यटन, जलविद्युत्, लगानी, निर्जीवन बिमा र व्यापार उपसमूहको परिसूचक बढेको छ भने उत्पादन तथा प्रशोधन, लघुवित्त र म्युचुअल फन्ड उपसमूहको परिसूचक घटेको छ।
नेप्से परिसूचकमा गिरावट आए पनि मानुषी लघुवित्त, युनिक नेपाल लघुवित्त र शुभम् पावरको सेयर सकारात्मक सर्किट लेभलमा कारोबार भएको छ। यता, सानिमा ग्रोथ फन्डको इकाई मूल्य ८.५६ प्रतिशत घटेको छ। हिमालयन डिस्टिलरी कम्पनीको ६ करोडभन्दा बढीको सेयर कारोबार भएको छ।