काठमाडौँ– हाल देशमा स्थानीयसँगै पश्चिमी वायुको सामान्य प्रभाव रहेको छ।
जसका कारण पहाडी भूभागका केही स्थानमा हल्का वर्षा भइरहेको छ। दिउँसो देशभरको मौसम आंशिकदेखि सामान्य बदली रहने छ।
पहाडी र तराई भूभागमा मेघ गर्जन, चट्याङ र हावाहुरीसहित मध्यम वर्षा हुने मौसम पूर्वानुमान महाशाखाले जनाएको छ।
राति देशभर आंशिकदेखि सामान्य बदली रहने छ। कोशी, मधेश र बागमती प्रदेशमा राति पनि मेघ गर्जन र चट्याङसहित पानी पर्ने महाशाखाको अनुमान छ।
चट्याङ र हावाहुरीबाट क्षति हुन नदिन आवश्यक तयारी गरी सतर्कता अपनाउनसमेत महाशाखाले अनुरोध गरेको छ।