संविधानको संरक्षकबाट संविधान मिचियोः अध्यक्ष दाहाल

काठमाडौँ- नेकपा (माओवादी केन्द्र) का अध्यक्ष पुष्पकमल दाहालले संविधानको संरक्षकबाट संविधान मिचिएको बताएका छन्। शुक्रबार काठमाडौंमा आयोजित अखिल नेपाल किसान महासंघ (क्रान्तिकारी केन्द्र) को तेस्रो राष्ट्रिय भेलालाई सम्बोधन गर्दै अध्यक्ष दाहालले संविधानको पालक र संरक्षकले नै खुलेआम संविधान मिच्ने काम गरेको बताका हुन्।

उनले संरक्षकबाट नै जानीबुझी संविधान मिच्नु सामान्य कुरा नभएको भन्दै आन्दोलनबाट प्राप्त उपलब्धि खोस्ने षड्यन्त्र भइरहेको टिप्पणी गरे। देशमा प्रतिगमनको षड्यन्त्र गत वर्षदेखि सुरु भएको उल्लेख गर्दै हालसम्म नरोकिएको उनको भनाइ थियो। आफूहरूले सतर्कता गुमाएमा तथा एकतालाई कमजोर पारेमा कुनै पनि दिन प्रतिगमन हुनसक्ने खतरा रहेको पनि उनले बताए।

"हामीले आफ्नो सतर्कता गुमायौँ भने, हामीले हामीभित्रको एकतालाई कमजोर हुन दियौँ भने, हामीले आम किसान, मजदुर, सुकुम्बासी, सम्पूर्ण उत्पीडित वर्ग, समुदायलाई आन्दोलित गरिराख्ने, जागरुक गरिराख्ने, संगठित गरिराख्ने आफ्नो अभियानलाई रोक्यौँ भने कुनै पनि दिन प्रतिगमन हुनसक्ने खतरा छ," दाहालले भने, "मैले यो कुरा अमूर्त कुरा गरेको होइन । मैले मूर्तरूपमा भन्दैछु।"

राष्ट्रपति विद्यादेवी भण्डारीले नागरिकता विधेयकलाई प्रमाणीकरण नगरेकोप्रति असन्तुष्टि व्यक्त गरे। विधेयक प्रमाणीकरण नगरेर संविधान र परिवर्तनमाथि प्रहार भएको अध्यक्ष दाहालको भनाइ थियो। उनले प्रतिगमनको 'फणा' उठेको भन्दै परिवर्तनको रक्षाका लागि सडकमा जानुपर्ने आवश्यकता रहेको बताए।

"नागरिकता विधेयक जन्मसिद्ध नागरिक भएका आमा बाबुका छोराछोरीले नागरिकता प्राप्त गर्नुपर्छ भन्ने विधेयकलाई प्रमाणीकरण नगर्ने कसरतभित्र पनि यो संविधान र यो परिवर्तनलाई कहीँ न कहीँ यसमाथि प्रहार गर्ने नियोजित प्रयासहरू भइराखेका छन्," उनले भने, "सबै एकजुट भएर आवाज नउठाउने हो भने सडकमा नजाने हो भने प्रतिगमनका यी फणाहरू अहिले जो फेरि उठ्न थालेका छन्, त्यसले डस्नसक्छ परिवर्तनलाई ।"

एकथरी मानिस प्रचण्ड सिद्धियोस् भनेर रातदिन धूप हालेर बसेको दाहालले बताए। आफूलाई अस्थिरताको काक भएको प्रचार गरेर प्राप्त राजनीतिक उपलब्धि उल्ट्याउने षड्यन्त्र भएको उनको दाबी थियो।