तस्वीर: नमोबुद्ध नगरपालिका
काभ्रे– नमोबुद्ध नगरपालिकामा तीनदिने ग्रामीण चलचित्र महोत्सव आयोजना गरिने भएको छ। ग्रामीण परिवेशमा आधारित चलचित्रलाई प्रोत्साहन गर्ने उद्देश्यले जेठ अन्तिम साता महोत्सव गर्न लागिएको हो।
चलचित्र विकास बोर्डको सहयोगमा सेलिब्रेटी नेपालले गर्न लागेको महोत्सवमा ग्रामीण परिवेशमा आधारित २६ चलचित्र तथा ‘डकुमेन्ट्री’ प्रदर्शनी गरिने छ। यही जेठ २५, २६ र २७ गते खुला रूपमा चलचित्र प्रदर्शन गरिने संस्थाका अध्यक्ष रघुनाथ सापकोटाले जानकारी दिए।
महोत्सवमा प्रदर्शन गरिएका चलचित्र तथा डकुमेन्ट्रीलाई उत्कृष्ट १० विधामा अवार्ड प्रदान गरिने उनको भनाइ छ। साथै महोत्सवमा सरोकारवालाबीच ग्रामीण परिवेशमा आधारित चलचित्रका समीक्षासमेत हुनेछ। संस्थाले यसअघि गोरखाको लाप्राकमा ग्रामीण चलचित्र महोत्सवको आयोजना गरेको थियो।
महोत्सव आयोजनाले स्थानीयलाई मनोरञ्जनसँगै चलचित्रप्रतिको चासो तथा सांस्कृतिक, ऐतिहासिक एवं पर्यटकीय क्षेत्र नमोबुद्धमा चलचित्र छायांकनमा आकर्षण बढ्ने विश्वास गरिएको छ।